Tekla’s Handmade – ორიგინალური აქსესუარები და დიზაინი

თეონა სიამაშვილი 39 წლის მეწარმე და სამი შვილის დედაა, რომლის შემოქმედებითი გზა ბავშვობიდან დაიწყო. ბებიის ნასწავლი კერვა-ქარგვა და დედისგან ათვისებული ქსოვა საფუძველი გახდა იმ დიდი ენთუზიაზმისთვის, რომელსაც დღეს Tekla’s Handmade ჰქვია. თეონას საავტორო სამკაულები გამოირჩევა ორიგინალურობითა და განსხვავებული დიზაინით.

იდეა, რომელიც ნაძვის ხის სათამაშოებიდან დაიბადა

ყველაფერი 2015-16 წლებში, ჭრა-კერვის კურსების გავლით დაიწყო, თუმცა სამკაულების შექმნის იდეა გაცილებით გვიან, სრულიად სპონტანურად გაჩნდა.

„ახალი წელი ახლოვდებოდა, როდესაც ნაძვის ხის სათამაშოების შექმნა დავიწყე. მუშაობის პროცესში ვიფიქრე – იქნებ ყელსაბამიც შევძლო? მასალა შევიძინე და გამოვიდა… ასე გაიღვიძა ჩემში უფლისგან ბოძებულმა ნიჭმა,“ – იხსენებს თეონა.

პირველი წარმატება: რომში გაგზავნილი საჩუქარი

პირველი გაყიდული ნივთი თეონასთვის უდიდესი სტიმული აღმოჩნდა. მისმა ახლობელმა ყელსაბამი შეიძინა და საჩუქრად იტალიაში, კერძოდ რომში ჩაიტანა. სწორედ ამ პირველმა ნაბიჯმა მისცა ავტორს ძალა, რომ საკუთარი გვერდი გაეხსნა და ფართო აუდიტორიისთვის გაეცნო თავისი შემოქმედება.

ხარისხი და შრომატევადი პროცესი

Tekla’s Handmade-ის სამკაულები მზადდება:

• მინერალური ქვებისგან;

• უჟანგავი მეტალებისგან.

ავტორი აღნიშნავს, რომ სამკაულის შექმნა მხოლოდ ნახევარი საქმეა. დიდ დროს მოითხოვს ფოტო და ვიდეო გადაღება, რადგან თითოეულ დეტალს, ფონს და მუსიკალურ გაფორმებას გადამწყვეტი მნიშვნელობა აქვს პროდუქტის წარსადგენად.

გამოწვევები და სამუშაო რიტმი

თეონა თვითნასწავლი ხელოვანია და საქმეს სახლიდან უძღვება. მთავარი სირთულე ყველასგან განსხვავებული დიზაინის მოფიქრება და ბალანსის პოვნაა საოჯახო საქმეებსა და შემოქმედებას შორის.

„ბალანსის დაცვა რთულია, ამიტომ ხშირად ღამით მუშაობა მიწევს, რათა ნივთი ზუსტად ისეთი გამოვიდეს, როგორიც გონებაში წარმოვიდგინე.“

სამომავლო გეგმები და რჩევა დამწყებებს

თეონას მიზანია მონაწილეობა მიიღოს გამოფენებში და თავისი საავტორო ნამუშევრები კიდევ უფრო ფართო აუდიტორიას გააცნოს. დამწყებ მეწარმეებს კი ურჩევს:

„დაიწყეთ ნებისმიერი საქმე სიყვარულით და მოთმინებით. ხელსაქმეს დიდი დრო და სიმშვიდე სჭირდება, რათა მიიღოთ ის შედეგი, რაც წარმოსახვაში გაქვთ.“

დამატებითი ინფორმაციისთვის დაუკავშირდით